Pas eksperiencave te Barcelona, Arabi Saudite dhe kualifikimit për në Botëror me Bregun e Fildishtë, Franck Kessie po konsideron një rikthim në Serie A, ku kaloi momentet më të lumtura të karrierës së tij. Ish-mesfushori i Milanit, që fitoi titullin kampion nën drejtimin e Stefano Piolit, dëshiron të largohet nga Al-Ahli, klub në të cilin u transferua për 12.5 milionë euro në verën e vitit 2023.
Sipas mediave italiane, Juventusi ka shprehur interes për Kessie-n, pas tentativave të dështuara për ta transferuar gjatë merkatos së verës. Kessie ka një kontratë me klubin arab deri në vitin 2026, por ndjehet se nuk është përshtatur plotësisht me stilin e lojës në Arabinë Saudite dhe dëshiron të rikthehet në Evropë për të konkurruar në nivele më të larta.
Në moshën 28-vjeçare, Kessie ka aftësi të mrekullueshme si një mesfushor: ai është fizikisht i fortë, ka përvojë dhe është i shkathët në sulm, ndërsa është edhe efektiv nga pika e bardhë. Juventusi, i cili është në kërkim të një mesfushori të besueshëm për të forcuar repartin qendror, e sheh Kessie-n si alternativë të vlefshme, veçanërisht nëse transferimi i Koopmeiners dështon.
Megjithatë, një pengesë e madhe në këtë proces është paga e lartë e Kessie-t, e cila aktualisht arrin në 10 milionë euro në sezon. Kjo shumë tejkalon kufijtë financiarë të Juventusit. Për të realizuar transferimin, Kessie duhet të pranojë një ulje të konsiderueshme të rrogës, duke e afruar atë në nivelin e pagave të yjeve si Vlahovic, që variojnë nga 5 në 6 milionë euro.
Nëse Kessie pranon një marrëveshje të tillë, transferimi mund të jetë i realizueshëm dhe strategjik për Juventusin, i cili nën drejtimin e Damien Comolli synon të krijojë një skuadër me më shumë forcë fizike dhe përvojë ndërkombëtare.
