FRANCË- Franca dhe Gjermania po fillojnë bisedimet se si energjia bërthamore e Francës mund të mbështesë sigurinë evropiane. Themelet u hodhën gjatë një takimi mjaft të relaksuar midis presidenti francez, Emmanuel Macron dhe kancelarit gjerman Friedrich Merz në Francën jugore të mërkurën. Sot, të dy palët zhvilluan bisedime më formale në Toulon.
Në dokumentin e përbashkët pesëfaqësh, Franca dhe Gjermania nënvizojnë se forcat bërthamore strategjike të pavarura të Francës kontribuojnë ndjeshëm në sigurinë e përgjithshme të aleancës. Franca është i vetmi vend i BE-së që zotëron armë bërthamore pasi Britania u largua nga blloku. Ndryshe nga Britania, Franca nuk është anëtare e grupit të planifikimit bërthamor të NATO-s.
Mes luftës së Rusisë në Ukrainë dhe sjelljes së paparashikueshme të Presidentit të SHBA-së, Donald Trump, Macron ka propozuar hapjen e bisedimeve me vendet evropiane për të diskutuar se si parandalimi bërthamor i Francës mund të kontribuojë në sigurinë e kontinentit.
Kancelari gjerman Friedrich Merz tha gjatë fushatës zgjedhore se ishte i hapur për idenë, një ndryshim i rëndësishëm në qëndrimin e Gjermanisë, pasi Berlini kishte refuzuar vazhdimisht propozime të ngjashme në dekadat e fundit.
Lidhur me Ukrainën, Berlini dhe Parisi premtuan mbështetje të re për mbrojtjen ajrore, premtuan të blinin më shumë armë nga fabrikat ukrainase dhe mbështetën përfshirjen e Kievit në programet e mbrojtjes të BE-së.
Të dy vendet gjithashtu kërkuan më shumë fonde të përbashkëta të BE-së për ndihmë ushtarake, duke e lidhur atë në mënyrë të qartë me zhvillimin e industrisë së mbrojtjes të Evropës. Ata gjithashtu mbështetën projekte të përbashkëta me Kievin në kuadër të programeve të reja të investimeve të BE-së.
