Një aksident i rëndë rrugor ndodhi rreth orës 14:00 në rrugën që çon në bregdetin e fshatit Borsh. Ngjarja përfshiu dy automjete: një furgon që transportonte peshk me dy bashkëshortë – një burrë 62 vjeç dhe një grua 54 vjeçe, të cilët humbën jetën në vendngjarje si pasojë e përplasjes. Në automjetin tjetër ndodheshin dy të rinj, 30 dhe 28 vjeç. I 30-vjeçari është dërguar me urgjencë në Spitalin e Sarandës me dëmtime të rënda dhe ndodhet në gjendje kritike, ndërsa 28-vjeçari është jashtë rrezikut dhe stabilizuar.
Shkaqet e aksidentit ende nuk janë të qarta, por dyshohet se manovrimi i gabuar ose shpejtësia e lartë mund të kenë kontribuar në këtë tragjedi. Policia ka nisur hetimet për të zbardhur rrethanat e plota të ngjarjes.
Sipas informacionit të policisë, rreth orës 14:20, automjeti tip “Benz” u përfshi në aksident me furgonin. Nga kjo përplasje, humbën jetën drejtuesi i furgonit, K. M., rreth 60 vjeç, dhe një pasagjere që dyshohet të jetë bashkëshortja e tij, ende pa u identifikuar. Po ashtu, drejtuesi i automjetit tip “Benz”, M. Q., dhe pasagjeri P. A., janë dërguar në spital për ndihmë mjekësore.
Grupi hetimor është angazhuar për të sqaruar plotësisht rrethanat e aksidentit.
