Bandat shqiptare po shfrytëzojnë platformat sociale si TikTok, Facebook dhe Instagram për të shpërndarë cigare me çmime të ulëta në Mbretërinë e Bashkuar, sipas një hetimi të “Daily Mail”. Këto cigare, që shpesh përshkruhen si të ardhura nga Shqipëria ose Greqia, shiten për 6 deri në 7 paund për kuti, duke qenë shumë më të lira sesa mesatarja britanike prej 16 paundësh. Hetimi sugjeron se këto produkte mund të jenë kontrabanduar për të shmangur taksën e duhanit dhe mund të jenë gjithashtu të falsifikuara.
Një nga llogaritë e gjetura është e emërtuar “paketa cigaresh shqiptare” dhe ofron dërgesa në shtëpi për përdoruesit britanikë. Një faqe tjetër që promovonte cigare të shtrenjta është larguar nga TikTok pas denoncimeve. Gazetari i “Daily Mail” kishte mundësi të porosiste paketa cigare për vetëm 6.50 paund, krahasuar me çmime që arrijnë deri në 17.75 paund në supermarketet britanike.
Ervin Karamuço, profesor i kriminologjisë në Universitetin Shtetëror të Tiranës, theksoi se grupet e krimit shqiptar po e shohin kontrabandën e cigareve si një mënyrë për të rritur të ardhurat e tyre. Ai shprehu se është e pritshme që, përveç trafikimit të armëve dhe drogës, këto organizata të angazhohen edhe në tregtinë e paligjshme të duhanit. Megjithëse kjo lloj aktiviteti nuk është aq e përfitueshme sa tregtia me droga, ajo aktualisht mbetet një burim i rëndësishëm i të ardhurave për kriminelët.
Profesor Karamuço sugjeroi gjithashtu se zyrtarët e korruptuar të doganave mund të jenë duke e ndihmuar këtë tregti të paligjshme duke mbyllur sytë ose duke organizuar vetë dërgesat. Kriminelët shqiptarë janë përfshirë në kontrabandimin e cigareve në Bashkimin Evropian për mbi 20 vjet dhe Shqipëria është njohur si një qendër e prodhimit të cigareve të falsifikuara. Kohët e fundit, autoritetet bënë bastisje në një fabrikë në qytetin e Librazhdit, duke e theksuar këtë aktivitet kriminal.
