Një aksident i rëndë rrugor i ka marrë jetën dy të rinjve ditën e djeshme në aksin Vlorë–Fier, duke ndërprerë ëndrrat dhe jetën e tyre në moshë fare të re.
Luan Llanaj, 19 vjeç, dhe Tomorr Mbrati, 17 vjeç, po udhëtonin me një motor kur, rreth orës 13:35, ndodhi tragjedia. Sipas të dhënave paraprake, dyshohet se shoferi i motorit, 19-vjeçari Llanaj, humbi kontrollin e mjetit, i cili fillimisht u përplas me një shtyllë elektrike dhe më pas me një shtyllë tjetër druri.
Të dy të rinjtë u transportuan me urgjencë në spitalin rajonal të Vlorës. Fatkeqësisht, Luan Llanaj ndërroi jetë pak pas mbërritjes, ndërsa Tomorr Mbrati u dërgua në gjendje të rëndë drejt Spitalit të Traumës në Tiranë, por nuk mundi të mbijetonte.
Sot, familjarët, miqtë dhe komuniteti do t’u japin lamtumirën e fundit dy të rinjve, ndërsa hetimet për të zbardhur plotësisht shkaqet e aksidentit janë ende në vijim.
