ZVICRA- Një 23-vjeçar shqiptar ka mundur të arratiste në Baden të Zvicrës pak para se të hipte në një automjet për të burgosur. Sipas policisë vendase, personi i kërkuar kishte veshur pantallona të zeza, një xhaketë të zezë me mëngë me motive të bardha dhe këpucë të bardha dhe në momentin e arratisjes, ai mbante pranga. Pavarësisht një kërkimi të menjëhershëm me ndihmën e disa qenve të shërbimit, i burgosuri shqiptar nuk është gjetur ende.
Sipas mediave të huaja, nuk ka të dhëna që ai paraqet rrezik për publikun, por policia paralajmëron që të mos i afrohet askush. Të premten pasdite, Policia Kantonale e Aargaut, në bashkëpunim me Policinë Kantonale të Cyrihut. Sipas BRK News, rreth orës 15:00 kishte informacione se i burgosuri mund të ndodhej në zonën e Lägern.
Kërkimi u bë shumë i vështirë për shkak të pyllit të dendur dhe terrenit të pjerrët malor. Në aksion morën pjesë të dy policitë kantonale, një helikopter, qen shërbimi dhe mjete të ndryshme teknike. Sipas zëdhënësit të policisë Daniel Saridis për Blick, deri të shtunën në mëngjes i arratisuri nuk ishte kapur. Kërkimi i së premtes përfundoi pa rezultat. Mënyra se si do të vijojë kërkimi do të vendoset nga drejtuesi i operacionit.
Gazeta “Aargauer Zeitung” spekuloi në një artikull të premten në mbrëmje se i burgosuri mund të ketë pasur bashkëpunëtorë. Është e vështirë të imagjinohet, thuhet aty, që i arratisuri të ketë ikur pa një mjet apo diçka të ngjashme që e priste. Siç konfirmoi për gazetën zëdhënësi i policisë Pascal Wenzel, transporti i të burgosurit ishte kryer nga vetëm një punonjës i firmës së sigurisë Securitas. Kjo është praktikë e zakonshme për shkak të numrit të madh të transferimeve dhe transportimeve.
