Atletja shqiptare Luiza Gega ka marrë titullin “Qytetar Nderi” nga Bashkia e Bulqizës. Mbledhja e jashtëzakonshme është mbajtur sot dhe Këshilli Bashkiak me vota unanime i ka dhënë kampiones së Evropës titullin më të lartë.
“U zhvillua sot mbledhja e jashtëzakonshme pjeserisht online e Këshillit Bashkiak Bulqizë ku i pranishem ishte edhe kryetari i Bashkisë z.Lefter Alla dhe u miratua në mënyrë unanime, dhënia e titullit “Qytetar Nderi” i Bashkisë Bulqizë Znj. Luiza Gega, Kampione e Europës në Atletikë”, thuhet në njoftim.
Pak ditë më parë atletja shqiptare doli e para në garën 3000m me pengesa në Kampionatin Europian që u mbajt në Mynih të Gjermanisë. Nga metri i parë deri te i fundit, Gega dominoi garën dhe arriti të fitonte me kohën 9:11.31, duke marrë medaljen e artë dhe ngjitur Shqipërinë në majën e Europës.
