Janë publikuar fotot e viktimave të aksidentit tragjik të regjistruar të mërkurën në Itali, pasi një ambulancë u përplas me një autobus që transportonte fëmijë në tunelin Ca’ Gulino, përgjatë rrugës kombëtare SS73 midis Urbinos dhe Fermignano.
Një prej viktimave është dhe mjeku 42-vjeçar nga Elbasani, Sokol Hoxha, i cili humbi jetën së bashku me Stefano Sabbatini (shofer), Cinzia Mariotti di Acqualagna (infermiere) dhe pacientin që po transportohej me ambulancë, 85-vjeçari Alberto Serfilippi.
Ambulanca mori flakë pas përplasjes dhe katër shtetasit e sipërpërmendur nuk arritën dot të shpëtonin. Fatmirësisht nuk kishte viktima në radhët e 30 fëmijëve të moshës 7 deri në 13 vjeç, që udhëtonin në bordin e autobusit.
Në një mesazh prekës nga këshilltari i qarkut për kujdesin shëndetësor Filippo Saltamartini, për mjekun Hoxha thuhet se: “Personeli shëndetësor që punon në ambulancë rrezikon jetën çdo ditë dhe e vë në shërbim të pacientëve. Janë heronj të heshtur dhe të ditës: sot tre prej tyre ranë duke kryer detyrën. Duhet t’u jemi mirënjohës të gjithë atyre që e vënë veten në shërbim të komunitetit çdo ditë me kurajo dhe altruizëm”
Gjykuar nga pamjet e kamerave të sigurisë, rezulton se ambulanca po lëvizte pjesërisht në korsinë e kundërt në një kthesë brenda tunelit, duke u përplasur fuqishëm kokë më kokë me autobusin.
Megjithatë, hetimet e kryera nga policia rrugore do të qartësojnë në mënyrë përfundimtare dinamikën e ngjarjes.
