Në këtë sezon nuk fitoi asnjë trofe, por Real Madrid ka se për çfarë të krenohet. “Los Blancos” janë klubi me vlerën më të lartë në botë. Ky është përfundimi i revistës “Forbes” që ka publikuar renditjen e fundit të saj.
Sipas llogarive, madrilenët lenë pas të gjithë emrat e tjerë të mëdhenj të futbollit europian, pasi vlerësohen 6.07 miliardë dollarë.
Treshja e parë e “Forbes” plotësohet me Manchester United dhe Barcelonën.
“Djajtë e Kuq” vlerësohen 6 miliardë dollarë, e njëjta shifër kjo e përfolur shumë javët e fundit si oferta e sheikëve të Katarit për të blerë klubin e famshëm anglez.
Ndërkohë, pavarësisht problemeve të mëdha financiare, vlera e Barcelonës është 5.51 miliardë dollarë.
Klubet angleze dominojnë këtë renditje, pasi pesëshja e parë plotësohet me Liverpulin 5.29 miliardë dhe Manchester Cityn që ka vlerën 4.99 miliardë dollarë.
Po ashtu sipas “Forbes”, futbolli vazhdon të jetë një biznes shumë fitimprurës, pasi ta ardhurat e klubeve të mëdha të futbollit janë rritur me 14% nga një vit më parë.
