DHËRMI- Jahti luksoz “Opera” i sheikut Abdullah bin Zayed Al Nahyan, ministër i Jashtëm i Emirateve të Bashkuara Arabe dhe anëtar i familjes mbretërore të Emirateve të Bashkuara Arabe, është fotografuar ditën e sotme në jug të Shqipërisë.
Konkretisht, jahti i sheikut arab është ndaluar përballë Havanës së Vjetër në Dhërmi, ndërsa Abdullah bin Zayed Al Nahyan është larguar nga mjeti lundrues i shoqëruar nga policia. Ndërkohë burime bëjnë me dije se sheiku është drejtuar drejt vilës së kryeministrit Edi Rama.
Pak ditë më parë, filantropi Alex Soros bashkë me bashkëshorten e tij, Huma Abedin u fotografuan po ashtu në jug të vendit, në Dhërmi. Ndërkohë në një foto të publikuar në media, shihej Rama i ulur në tavolinë përballë me çiftin, teksa darkojnë në një restorant luksoz në zonë. Asokohe u raportuar se edhe Soros me gruan e tij po qëndronin në një nga vilat qeveritare në Dhërmi, pasuri publike e vendosur në dispozicion të miqve personalë të kryeministrit Rama.
