Mediat greke raportuan se vogëlushja ka qenë duke notuar me jelekun mbrojtës, në sy të të atit, por në momentin që ai ka tentuar ta marrë sipër në varkë, e mitura ka rrëshqitur nga jeleku dhe është mbytur, ndërsa 42-vjeçari tha se nuk u zhyt për ta shpëtuar pasi vuan nga astma
“Hëngrëm në një restorant, dhe vajza ime pa varkën dhe më kërkoi që të shkojmë tek varka që të vizatonte. U futëm në det, dhe kur tentova ta ngre sipër varkës, më rrëshqiti nga duart dhe ra në ujë. Nuk dinte not. Unë nuk u zhyta për ta shpëtuar sepse jam me astmë”, ka deklaruar ai.
Bashkëshortja e 42-vjeçarit, njëherësh nëna e Amelias e ka mësuar lajmin nga fqinjët e saj dhe në gjendje shoku tha vetëm këto fjalë: “Vajza ime! Pse ia bërë vajzës time këtë?! Pse nuk ka bëre mua?!”.
Babai i vogëlushes u arrestua fillimisht nën akuzën për ekspozimin e jetës së të miturës në rrezik, dhe është lënë i lirë një ditë më pas ku ka folur edhe për median greke Protothema.gr lidhur me tragjedinë në familjen e tij.
“Atë çfarë ka ndodhur ia kam thënë një nga një prokurorve dhe është e vërteta. Nuk do ta dëmtoja fëmijën, e adhuroja. E adhuroja fëmijën tim, ajo ishte forca ime”, ka treguar me lot në sy 42-vjeçari për ndërsa ka sqaruar se nuk ka pasur anjë konflikt me bashkëshorten e tij, që mund të çonte në një veprim kriminal në ngjarjen fatale të së hënës.
“Unë dhe gruaja ime nuk kemi asnjë problem, nuk kemi asnjë përplasje mes nesh. Ne jemi bashkë në atë që na ndodhi. Unë e pata fëmijën për një muaj rresht . Unë vija nga puna çdo pasdite dhe e merrja”, thekson 42-vjeçari.
“Sot fëmija im largohet dhe shkon në vendin tim për t’u varrosur . Nuk jam në gjendje të them asgjë tjetër. Unë thashë gjithçka në dëshminë time”, përfundoi prononcimin e tij i ati i vogëlushes.
Ndërkohë, fqinjët e 42-vjeçarit kanë zbuluar se ai e kishte marrë me qira banesën në Kalamaki prillin e kaluar dhe se çifti nuk ishin të divorcuar, pasi shfaqeshin herë pas here të interesuar për fëmijën e tyre.
Megjithatë, disa fqinjë në pallat kishin vënë re se 42-vjeçari nuk shfaqej i kujdesshëm sa herë që e çonte Amelian në shkollë ose për shëtitje.
“Ai dukej se e donte fëmijën. Por, sa herë që e merrte e vendoste në motor pa kaskë , pa siguri. Kjo thjesht më bëri përshtypje dhe i kisha thënë edhe burrit tim që do të duhej të flisnim me të, sepse nuk mund ta hipte një fëmijë kështu në motor”, tha një fqinje e 42-vjeçarit për protothema.gr.
Siç tregon ajo, as ajo dhe as ndonjë qiramarrës tjetër nuk e kishin kuptuar që çifti ishte ndarë.
“Një familje e qetë, që nuk kishte kontakt me askënd , që kishte një fëmijë të qeshur, të gëzuar. Të cilën babi e merrte çdo pasdite dhe e çonte për shëtitje. Ku? Nuk e di. Vajza e vogël ishte shumë e lumtur. Nëna jetonte këtu. Nuk e kisha idenë që janë ndarë, e kam mësuar nga TV. Ai vinte çdo pasdite. Nuk e kisha menduar kurrë këtë”, tha fqinja.
