Sa për të qeshur aq edhe për të qarë është situata e krijuar tek ekipi i Sopotit të Librazhdit. Problem vazhdojnë të jenë pagat e pamarra të futbollistëve qe janë kthyer në cështje.
Ekipi pasi përfundoi sezonin dhe zhvilloi vetëm raundin e parë të play off-it pasi u eleminua, ende nuk i ka mbyllur llogaritë. Disa lojtarë që janë njëkohësisht dhe punonjës në administratën e bashkisë Librazhd kanë nga dy paga pa marrë ndërsa pjesa tjetër, rreth 17 lojtarë përfshirë trajnerin Lleshanaku, nuk kanë marrë pagën e fundit atë të muajit Prill.
Teksa janë në pritje prej disa javësh të ndonjë lajmi nga administratori Andri Cota, njëherazi nën kryetar i Bashkisë Librazhd, javën e kaluar ka pasur edhe një takim mes 15 lojtarwve dhe administratorit Cota, në zyrat e bashkisë Librazhd. Në takim kërkesa e lojtarëve ka qënë e thjeshtë, lidhur me pagat e pamarra, ndërsa përgjigja nga ana e administratorit ka qënë se buxheti është në limite dhe se vetëm 5 lojtarëve ka mundësi t’iu japë pagat dhe se kush do jenë 5 lojtarët këtë duhet ta zgjedhin lojtarët mes njëri tjetrin.
Përballë këtij fakti lojtarët janë ulur dhe janë detyruar të vendosin mes njëri tjetrit se kush do ti merrte pagat. Dhe mënyra me origjinale që kanë gjetur për të zgjedhur ata që duhet ti marrin pagat ka qënë duke hedhur ‘letra me vrimë’. Kështu 5 lojtarët më me shans, që ju kanë qëlluar letrat me vrimë kanë qënë Mateus Levendi, Ardian Kaloshi, Denis Mici, Antonio Ranxha dhe ndihmës trajneri Shkëlqim Hajdari. Këta lojtarë më pas janë thirrur nga administratori në një lokal pranë bashkisë Librazhd, ku dhe ju janë shpërndarë paratë.
Lajmin e bën të ditur gazetari i sportit në qytetin e Librazhdit Ledion Qoshku, që ka publikuar në rrjetin e tij social Facebook, një foto të bisedës që lojtarët dhe administratori kanë zhvilluar në whats up. Gazetari ngre dyshimin lidhur me buxhetin e sportit tek Sopoti, se është i manipuluar pasi sipas raporteve financiare që buxheti i bashkisë Librazhd ka dhe dega e thesarit akordon cdo muaj, janë të bollshme për të mbuluar shpenzimet e pagave të lojtarëve.
Në buxhetin e bashkisë, fondi për sportin tejkalon 120 milionë lekë (të vjetra) në vit, që lëvrohen sipas raporteve në degën e thesarit 10 milionë (të vjetra) cdo muaj. Ndërkohë që edhe pse janë kaq para në dispozicion për një ekip sporti që militon në kategorinë e dytë, sërisht problemet financiare janë prezente dhe lojtarët detyrohen të bëjnë zgjedhje me ‘letra me vrimë’ se kush do të marrë pagat e kush jo.
