Shtetet e Bashkuara kanë sekuestruar një tjetër anije cisternë në Detin e Karaibeve, duke e çuar në gjashtë numrin e anijeve të ndaluara për të kontrolluar eksportet e naftës venezueliane, sipas zyrtarëve amerikanë. Anija cisternë Veronica u ndal gjatë një operacioni të shpallur “pa incidente” nga ushtria amerikane, e cila tha se ajo po shkelte “karantinën e anijeve të sanksionuara” të vendosur nga Presidenti Donald Trump. Komanda Jugore e SHBA-së e theksoi se vetëm nafta e eksportuar “në mënyrë të koordinuar dhe ligjore” do t’i lejohej të largohej nga vendi.
Veronica është cisterne e fundit që operon në kundërshtim me këtë karantinë, siç u raportua në një postim në rrjetet sociale nga Komanda Jugore, i shoqëruar me video të operacionit. Sipas shërbimit të monitorimit TankerTrackers.com, Veronica, me flamur të Guajanës, është nisur bosh nga ujërat venezueliane në fillim të janarit dhe më parë ishte regjistruar në Rusi me emra të ndryshëm.
Sekretarja e Sigurisë Kombëtare e SHBA-së, Kristi Noem, deklaroi se operacioni u realizua në “bashkëpunim të ngushtë” me ushtrinë, Departamentin e Shtetit dhe Departamentin e Drejtësisë. Ajo përgëzoi Rojën Bregdetare për realizimin e një operacioni të ekzekutuar pa probleme dhe në përputhje me ligjin ndërkombëtar.
Ky operacion është pjesë e përpjekjeve të vazhdueshme të SHBA-së për të frenuar eksportet e naftës nga Venezuela, në kuadër të sanksioneve të vendosura për të bërë presion ndaj qeverisë së Presidentit Nicolás Maduro.
