Italia ka njoftuar se do të ndalojë flotiljen ndërkombëtare “Globale Sumud”, e cila përbëhet nga mbi 40 anije civile dhe më shumë se 500 aktivistë, përfshirë Greta Thunberg, që po tenton të dërgojë ndihma humanitare në Gaza. Flotilja, e cila po lundronte në ujëra të hapura, u afrua 278 km nga bregu i Gazës, ndërsa ushtria italiane kishte në dispozicion një fregatë për ndërhyrje në rast konflikti.
Italia ofroi një zgjidhje alternative për flotiljen, duke propozuar që ndihmat të zbarkonin në një port në Qipro, për të shmangur çdo përplasje me trupat izraelite. Megjithatë, përfaqësuesit e flotiljes e refuzuan këtë propozim, duke theksuar se qëllimi i tyre ishte të thyenin bllokadën e vendosur nga Izraeli. Flotilja vazhdoi lundrimin, duke theksuar nevojën e domosdoshme për dërgimin e ndihmave humanitare në Gaza.
Megjithatë, situata u bë më e tensionuar kur, javën e kaluar, flotilja u sulmua në ujërat ndërkombëtare pranë Greqisë me dronë të armatosur. Italia dhe Spanja patën dërguar anije ushtarake për të monitoruar lundrimin e flotiljes, por pa qëllim të angazhoheshin në ndonjë përplasje të drejtpërdrejtë.
Qeveria izraelite e ka bërë të qartë se do të përdorë çdo mjet të mundshëm për të parandaluar flotiljen që të arrijë në Gaza, duke e mbrojtur bllokadën si një masë të ligjshme në luftën kundër militantëve të Hamasit. Aktivistët janë të shqetësuar për ndonjë sulm të mundshëm nga Izraeli në orët në vijim.
Ministri italian i mbrojtjes, Guido Crosetto, paralajmëroi se ndalimi i anijeve mund të ndodhë në det të hapur dhe aktivistët mund të arrestoheshin, ndërsa kryeministrja Giorgia Meloni ka theksuar se flotilja duhet të ndalojë për të mos penguar përpjekjet për paqe, duke iu referuar propozimeve të presidentit amerikan Donald Trump. Edhe Papa Leoni shprehu shqetësim për sigurinë e aktivistëve, duke bërë thirrje për respekt dhe shmangie të dhunës.
