Në ndeshjen e javës së 17-të të Superiores, Flamurtari dhe Teuta ndanë pikët me rezultatin 2-2, por pasiqë u tentua një përleshje në fushë ndërmjet tifozëve vlonjatë dhe lojtarëve të Teutës, situata shkaktoi ndërhyrjen e policisë për të rikthyer qetësinë.
Përmes një komunikate zyrtare, klubi i Flamurtarit shprehu keqardhjen për incidentin, duke theksuar se disa individë hyjnë në fushë dhe u përfshinë në përplasje, duke rrezikuar sigurinë e aktivitetit sportiv. Klubi distancohet qartësisht nga çdo formë dhune dhe sjellje që dëmton imazhin e tij dhe dinjitetin e sportit, duke theksuar se këto veprime nuk përfaqësojnë vlerat e klubit apo të qytetit të Vlorës.
Flamurtari thekson se shumica dërrmuese e tifozëve e mbështesin ekipin me pasion dhe qytetari. Klubi angazhohet të bashkëpunojë me Policinë e Shtetit dhe autoritetet përkatëse për identifikimin e përgjegjësve dhe sqarimin e plotë të ngjarjes, duke ofruar çdo informacion të nevojshëm.
Gjithashtu, Flamurtari njofton se do të intensifikojë punën dhe komunikimin me tifozët e tij, në mënyrë që mbështetja për ekipin të mbetet e fortë, por gjithmonë brenda respektit dhe rregullave, me synimin për të shmangur përsëritjen e ngjarjeve të ngjashme në të ardhmen.
