Arian Ndoja, deputet i zgjedhur i koalicionit “Partia Demokratike – Aleanca për Shqipërinë Madhështore”, ka shënuar një rezultat të rëndësishëm në zgjedhjet parlamentare të 11 majit 2025. Ai ka marrë 8232 vota preferenciale në qarkun e Durrësit, duke u renditur ndër kandidatët më të votuar të këtij qarku.
Ky rezultat e vendos Ndojën përpara Igli Carës, i cili në zgjedhjet e vitit 2021 kishte siguruar 6952 vota, duke qenë atëherë kandidati më i votuar i Partisë Demokratike në Durrës. Rritja e ndjeshme e mbështetjes për Ndojën konsiderohet si tregues i forcimit të koalicionit opozitar në këtë zonë të rëndësishme elektorale.
Përmes një postimi në rrjetet sociale, Ndoja ka shprehur mirënjohjen e tij për mbështetësit: “Me anë të këtij statusi, ju përshëndes të gjithë juve që votuat numrin 1, dhe ata që më votuan edhe mua si kandidat! Ju jam mirënjohës dhe do të përpiqem të jem zëri juaj!”
Ai ka falënderuar gjithashtu të gjithë kandidatët e Aleancës për Shqipërinë Madhështore dhe strukturat e Partisë Demokratike për angazhimin dhe sjelljen qytetare gjatë fushatës. “Zoti ju bekoftë!”, përmbylli ai mesazhin e tij.
Postimi i plotë:
Me anë të këtij statusi, ju përshëndes të gjithë juve që votuat numrin 1, dhe ata që më votuan edhe mua si kandidat! Ju jam mirënjohës dhe do të përpiqem të jem zëri juaj! Një falenderim i vecantë për të gjithë kandidatët e Aleancës Shqipëria Madhështore, strukturat e Partisë Demokratike, për punën e bërë dhe sjellien qytetare gjatë kësaj fushate. Zoti ju bekoftë!
