DVP Tiranë ka vazhduar operacionin “Fireworks”, i dizajnuar për të ndaluar tregtimin e paligjshëm të lëndëve piroteknike nga subjekte të paautorizuara, veçanërisht në periudhën e festave të fundvitit. Gjatë kontrolleve të fundit, policia ka zbuluar sasi të konsiderueshme fishekzjarresh dhe kapsollash në tri markete në Kombinat, Kamzë dhe Krujë.
Të tre pronarët e këtyre subjekteve u arrestuan, dhe u sekuestruan kutitë me materialin piroteknik. Me këto arrestime, numri total i rasteve të zbuluara për paligjshmëri në këtë sektor ka arritur në shtatë, që nga fillimi i operacionit.
Policia e Tiranës ka intensifikuar kontrollet ditore për të evidentuar aktivitete të paligjshme që rrezikojnë shëndetin e qytetarëve. Gjatë verifikimeve, u arrestua gjithashtu shtetasi E. B., 21 vjeç, pasi u gjetën në automjetin e tij lëndë piroteknike, të cilat dyshohet se ishin porositur nga shtetasi E. P., 20 vjeç, i cili është shpallur në kërkim.
Materialet për këto raste iu dorëzuan Prokurorisë së Tiranës për veprime të mëtejshme. Policia ka theksuar se veprimtaria e tregtimit dhe përdorimit të lëndëve piroteknike në kundërshtim me rregullat është e ndaluar me ligj, dhe apelon për qytetarët që të shmangen nga këto aktivitete, duke e theksuar rrezikun që ato përbëjnë për jetën dhe shëndetin e tyre.
Kontrollet do të vazhdojnë, në përpjekje për të mbajtur të sigurt komunitetin gjatë festave.
