Një situatë alarmante është raportuar nga emisioni Fiks Fare në shkollën 9-vjeçare të Maqellarës, ku tualetet prej ditësh janë jashtë funksioni. Kjo ka detyruar nxënësit, përfshirë ata të ciklit të ulët, të kryejnë nevojat personale në korridoret e shkollës. Pamjet filmike dhe fotografitë e publikuara nga emisioni tregojnë një gjendje skandaloze të ambienteve higjieno-sanitare, me tualet të bllokuara dhe dyer të dëmtuara, ndërsa mungesa e një sanitareje ka rënduar situatën.
Drejtori i shkollës deklaroi se problemi kryesor është mungesa e një punonjësi sanitar, duke bërë të ditur se këtë vit pastrimi është bërë nga mësuesit dhe nxënësit. Në vitet e kaluara, pagesa për sanitaren ishte në duar të prindërve, ndërsa tani përgjegjësia është kaluar tek bashkia.
Ai theksoi se situata ka degraduar ndjeshëm për shkak të mungesës së personelit për pastrim dhe se nxënësit e klasave të para hasnin vështirësi për të përdorur tualetet. Megjithatë, ai më vonë sqaroi se fëmijët kanë pastruar vetëm klasat, ndërsa tualetet janë trajtuar nga mësueset.
Gazetarët kontaktuan Bashkinë Dibër, ku nënkryetari Lorenc Cibaku konfirmoi se ishin të njohur me situatën dhe se ishte marrë vendimi për të dërguar një sanitare pranë shkollës. Sipas tij, punonjësit e shërbimit do të ishin të pranishëm për të pastruar tualetet dhe për të siguruar që një sanitare do të ishte në vazhdimësi në shkollë.
Vetëm dy orë pas kësaj, tualetet u zhbllokuan dhe u pastruan nga punonjësit e bashkisë, duke shuar shqetësime të menjëhershme për nxënësit. Situata ka tërhequr vëmendjen e publikut, duke nxjerrë në pah nevojën për përmirësimin e kushteve higjieno-sanitare në shkolla.
