Një ngjarje e çuditshme ka ndodhur në Kukës, ku Hysni Hani, një qytetar i arrestuar në Fushë-Krujë, pretendon se prokuroria ka humbur paratë e sekuestruara gjatë hetimit të tij. Hani u arrestua për tentativë blerjeje armë dhe u dënua me 13 muaj burg, duke kryer 7 muaj e 15 ditë.
Në momentin e arrestimit, prokuroria i sekuestruan Hani 1 milion lekë të vjetra, 500 euro, dy celularë dhe automjetin e tij, duke e regjistruar gjithçka si prova materiale. Pas përfundimit të procesit gjyqësor, ai shpresoi të merrte mbrapsht sendet dhe paratë, por kur shkoi në prokurori, i thanë se shumica e parave mungonte. Nga 1 milion lekë dhe 500 euro, atij iu dorëzuan vetëm 100 mijë lekë dhe 100 euro, së bashku me celularët.
Hani ka kërkuar ndihmë për të zbuluar fatin e parave të tij në emisionin Fiks Fare. Rasti është hetuar nga Prokuroria e Shkodrës, e cila regjistroi një procedim penal për ‘Vjedhje duke shpërdoruar detyrën’, por pas disa muajsh hetimesh, vendosi të pezullojë çështjen për mungesë autorësh.
Sipas vendimit të prokurorisë, janë intervistuar 7 punonjës të Prokurorisë së Kukësit, duke përfshirë oficerë të policisë gjyqësore dhe sekretaren, të cilët mohuan hapjen e zarfit ose marrjen e parave. Kryesekretari i Prokurorisë, Flamur Cejku, ka sqaruar se zarfi ka kaluar përmes gjykatave dhe se nuk mund të ofronte më shumë informacion pa një kërkesë zyrtare.
Edhe pse procedimi është pezulluar, Hysni Hani kërkon që të rihapet rasti dhe të gjenden përgjegjësit për zhdukjen e parave, që ai beson se ishin të ruajtura nga prokuroria. Ai shprehet se besoi në sistem, por tani ndjehet tradhtuar nga organi i akuzës dhe shpreson të zbulohet kush është përgjegjës për humbjen e shumës së tij.
