Një segment i rrugës “Dervish Shaba” në Mjull Bathore ka krijuar një situatë të rrezikshme për banorët e zonës. Rruga, që dikur ishte një lidhje e rëndësishme, po shembet gradualisht, duke e bërë kalimin pothuajse të pamundur. Banorët raportojnë se ky problem ka nisur disa muaj më parë dhe aktualisht është përkeqësuar, duke rritur frikën për aksidente.
Pamjet tregojnë se rruga është ndjeshëm e ngushtuar, sa që kalimi i automjeteve, veçanërisht të atyre me tonazh të rëndë si betonierët, është bërë i vështirë. Banorët shprehen se situata është alarmante, pasi asnjë ndërhyrje konkret e institucioneve nuk është realizuar deri tani. Mungesa e sinjalistikës është një tjetër problem, pasi tabela e ndalimit ka rrëshqitur, duke lënë segmentin pa paralajmërime për drejtuesit e mjeteve.
Përfaqësues të Njësisë Administrative Farkë konfirmojnë se rrëshqitja e tokës është shkaktuar nga reshjet e fundit. Sipas tyre, janë ndërmarrë disa masa fillestare dhe është vendosur sinjalizim, megjithatë pranojnë se tabela e ndalimit mund të ketë rënë dhe premtojnë se do të bëjnë verifikime të mëtejshme.
Çështja është dërguar për shqyrtim emergjent në Bashkinë Tiranë, ku autoritetet e pranojnë se dëmtimi i mëtejshëm mund të sjellë probleme serioze për banorët. Dritan Dango, drejtori i Emergjencave Civile, deklaroi se do të kryhen verifikime të tjera në terren dhe se çështja do t’i kalojë Institutit Gjeologjik për të përcaktuar nëse është e nevojshme një riparim i tillë.
Ndërkohë, banorët vazhdojnë të përballen me pasiguri, duke kaluar çdo ditë në një rrugë që po zhduket, duke u rrezikuar jo vetëm ata, por edhe mjetet që përdorin këtë segment të rëndësishëm për lidhjet e tyre të përditshme. Situata kërkon një zgjidhje urgjente për të parandaluar ndonjë katastrofë të mundshme.
