Një rast tragjik dhe me pasoja fatale është denoncuar në emisionin Fiks Fare nga një qytetar i Durrësit, që lidhet me aksidentin fatkeq të nënës së tij. Nëna e tij ka humbur jetën pas 20 ditësh në reanimacion, por çuditërisht, shkaku i vdekjes është shënuar “vdekje natyrale” në skedën zyrtare, ndërsa autori i dyshuar, një 24-vjeçar, është lënë i lirë.
Ngjarja ndodhi më 27 dhjetor, kur e moshuara u aksidentua në lagjen e saj, duke u goditur nga një automjet. Pamjet filmike tregojnë se drejtuesi i mjetit, pas goditjes, lëvizi makinën mbrapsht duke e lënë gruan poshtë saj. Dëshmitarët e rastit shpëtuan të moshuarën duke e nxjerrë nga nën automjet dhe ajo u transportua menjëherë në spital.
Familjarët e viktimës shprehen të shqetësuar dhe të tronditur nga fakti se autori është lënë i lirë, duke theksuar se nuk kanë marrë informacion të saktë nga institucionet. Ata deklarojnë se Prokuroria kërkoi masën e arrestit, por gjykata vendosi një masë më të lehtë, vetëm “detyrim për paraqitje” dhe ndalim daljes jashtë vendit. Një përfaqësues i Prokurorisë, gjatë seancës, u shpreh se e aksidentuara “ka qenë jashtë rrezikut për jetën”, ndonëse ajo vdiq pas disa ditëve.
Fiks Fare iu drejtua Prokurorisë së Durrësit për detaje mbi kërkesën e prokurorit dhe mbi testin e alkoolit për drejtuesin e mjetit, por prokurori Sokol Nishani nuk ka dhënë përgjigje. Familjarët, të pasigurt mbi shkaqet e vdekjes, kanë siguruar skedën e vdekjes, ku shkaku ndërlidhet me “vdekje natyrale”, që ka shtuar dyshimin dhe revoltën e tyre.
Një mjek, i cili ka firmosur skedën, pranoi se ishte bërë një gabim, duke e cilësuar si një “lapsus momenti”. Ai shprehu keqardhjen për situatën duke theksuar se kishte shkruar “traumë” në përshkrimin e rastit, por ky informacion nuk përfundoi në skedën e vdekjes.
Familjarët e viktimës janë të vendosur të vazhdojnë kërkesat e tyre për drejtësi, me vajzën e të ndjerës që deklaron se nuk do ta falin autorin nëse ai nuk merr dënimin e merituar nga shteti.
