Kryeministri i vendit, Edi Rama, u shpreh nga Peshkopia se qeveria po mendon për të aplikuar një taksë për sipërfaqen e tokës, e cila nuk punohet nga fermerët.
Në takim me operatorët turistikë, Rama theksoi se “fermerët nuk mund ta mbajnë tokën e papunuar, ose duhet ta punojnë ose ta japin me qira”, sic ndodh në vendet e tjera të botës.
“Në pikën ku ne e kemi nisur, me 120 milionë euro eksporte dhe do të arrijmë gjysmë miliardi këtë vit. Po kush i bën këto gjysmë miliardi eksporte kudo në Europë, në Amerikë, kudo? I bën qeveria? I bëjnë njerëzit. Natyrisht që ne mbështesim sa mundemi. Bujqësia jo vetëm nuk po ngordh, por bujqësia po ecën me hapa të të vegjël, por të sigurt dhe na tregojnë llogaritë”, tha ai.
Sipas tij, Shqipëria është i vetmi vend, i cili nuk e takson fermerin, ndaj u bëri thirrje këtyre të fundit që t’i përshtaten kërkesave të tregut.
“Tregu kërkon këtë lloj molle e jo atë mollë, e ndërkohë hedh mollën dhe tallet me satelitët ndërkohë që ai komshiu vet i shet mollët jashtë dhe i përdor satelitët dhe ai normalisht duhet të ankohej. Jo, ai shkon i merr me qira jashtë shtetit shërbimet satelitore për mollët, llogarite. Kështu që, kjo është vështirësi shumë e madhe sepse vendoset një pengesë shumë e vazhdueshme”, u shpreh Rama.
