Policia Kufitare Kakavijë ka njoftuar se aksesi rrugor Kakavijë–Janinë, veçanërisht në kryqëzimin e fshatit Kallpaq, do të jetë i bllokuar sot nga ora 18:00 deri në 21:00 për shkak të një proteste nga fermerët. Njoftimi i është dhënë institucionit të Policisë Kufitare Kakavijë nga Policia Kufitare Greke përmes qendrës së përbashkët të shkëmbimit të informacionit.
Gjatë kësaj periudhe bllokimi, do të lejohet qarkullimi vetëm për automjetet me emergjenca shëndetësore. Për këtë arsye, Policia Kufitare Kakavijë kërkon mirëkuptimin e qytetarëve dhe i sugjeron atyre që të planifikojnë udhëtimet në orare të tjera për të shmangur pengesat që mund të shkaktojë protesta.
