Disa klube të Serie A në Itali përballen me rrezikun e bllokimit të merkatos së transferimeve për shkak të një parametri të ri të sjellë nga Federata Italiane e Futbollit, të quajtur ‘kosto e zgjatur e punës’. Ky parametër, i sapo miratuar, ka për qëllim të ulet nga 80% në 70% deri në qershor 2026, përveç lojtarëve të rinj italianë (U23), të cilët përjashtohen për të stimuluar akademinë e të rinjve dhe për t’iu lehtësuar situatën financiare klubeve.
Sipas gazetës italiane ‘Il Messaggero’, ky zhvillim mund të ndikojë negativisht në disa skuadra që nga janari, përfshirë Lazio, e cila tashmë ka hasur vështirësi me bllokimin e merkatos për sezonin e verës, si dhe Napolin, Atalantën, Fiorentinën, Torinon dhe Genoan. Këto klube tashmë janë në një situatë të tensionuar, duke u përpjekur të arrijnë plusvalenca për të shmangur rreziqet e bllokimit të mëtejshëm në merkato.
Të gjitha klubet duhet të dorëzojnë bilancet e tyre deri më 30 nëntor, duke raportuar për situatën deri në 30 shtator. Një komision i ri do t’i vlerësojë këto bilance përpara se t’i dërgojë në Federatë, e cila do të vendosë për fatin e tyre në merkato. Kjo do të ndihmojë në përcaktimin nëse klubet do të përjetojnë të njëjtin fat si Lazio.
Megjithatë, shqetësimet nuk ndalen vetëm këtu. Duke nisur nga qershori 2026, klubet e Serie A do të ndodhen përballë rregulloreve të reja të UEFA-s për treguesit ekonomikë. Shkelja e këtyre rregullave do të çojë në sanksione, duke përfshirë gjoba dhe bllokim të merkatos, çka rrit presionin mbi klubet për të menaxhuar financiarisht situatat e tyre dhe për të siguruar stabilitetin që kërkohet nga agjencitë rregullatore.
