Një operacion masiv policor është zhvilluar në Greqi nga Drejtoria për Luftën kundër Krimit të Organizuar, i cili ka goditur një rrjet të organizuar që merrej me kontrabandën e karburanteve dhe mashtrimin ndaj qytetarëve. Operacioni ka përfshirë ndërhyrje në dhjetëra pika karburanti dhe depo në zona të ndryshme, si Atika, Selanik, Arta, Trikala, Larisë, Katerinë, Volos dhe Lakoni. Këto subjekte ishin nën vëzhgim të autoriteteve për një kohë të gjatë dhe, sapo u konstatua aktiviteti i paligjshëm, u ndërmorën veprime.
Gjatë operacionit, deri tani janë arrestuar 22 persona dhe disa pika karburanti janë pezulluar nga aktiviteti. Arrestimet janë përqendruar kryesisht në Atikë (13), Selanik (3), Trikala (2), Igumenicë (2), Spartë (1) dhe Volos (1). Sipas hetimeve, të arrestuarit ishin duke instaluar softuer të paligjshëm në pompat e karburanteve, duke manipuluar sistemin e matjes elektronike për të shitur sasi më të vogla karburanti se sa ato që tregoheshin në aparaturë. Akuzat përfshijnë gjithashtu evazion fiskal dhe pastrim parash, përmes përdorimit të dokumenteve fiktive.
Një zbulim i rëndësishëm gjatë kontrolleve ndodhi në Sindos të Selanikut, ku u gjet një depo me tretës të importuar ilegalisht nga Rumania. Të dyshuarit dyshohet se përpunonin karburantin në këtë depo para se ta shpërndanin në stacionet e përfshira në skemën e tyre të paligjshme. Hetimet kanë zbuluar gjithashtu lidhje me individë në Bullgari, nga ku besohet se ishin organizuar importet e tretësve.
Operacioni është ende në vazhdim dhe autoritetet kanë paralajmëruar se do të ketë edhe arrestime të tjera në ditët në vazhdim. Ky nuk është hera e parë që zbulohen rrjete të tilla që merren me kontrabandën e karburanteve dhe manipulimin e matësve elektronikë, duke ngritur shqetësime mbi cilësinë e karburanteve dhe ndikimin e tyre në tregun lokal.
