Avokati i ri i Popullit, Endrit Shabani, ka marrë sot zyrtarisht detyrën e tij, një ditë pas betimit në Kuvendin e Shqipërisë. Ai do të ushtrojë mandatin kushtetues që i është besuar, duke filluar një kapitull të ri për këtë institucion.
Prezantimi zyrtar i Shabanit përpara komisionerëve dhe stafit të institucionit u zhvillua nga Sekretari i Përgjithshëm i Kuvendit, Genci Gjonçaj, sipas procedurave kushtetuese dhe në shpirt të vijimësisë institucionale. Zgjedhja e tij vjen në një kohë të rëndësishme për Shqipërinë, e cila ndodhet në një fazë vendimtare të procesit të integrimit evropian. Në këtë kontekst, respektimi dhe garantimi i të drejtave të njeriut janë thelbësore.
Institucioni e vlerëson kontributin e paraardhëses, Erinda Ballanca, e cila udhëhoqi për 8 vjet dhe vazhdoi të ushtrojë funksionin edhe përtej afatit kushtetues. Gjatë kësaj periudhe, ajo ka garantuar stabilitet institucional dhe ka mbështetur të drejtat e qytetarëve në një ambient plot sfida.
Duke i uruar Shabanit sukses në detyrën e tij, institucioni shpreh vullnetin për një tranzicion të qetë dhe një bashkëpunim të plotë, me qëllim vijimin e misionit kushtetues në mbrojtjen e lirive dhe të drejtave të qytetarëve.
