AUSTRI- Lea Bajrami është 15-vjeçarja Kosovare që humbi jetën nga sulmi në shkollën Graz në Austri. Përmes një postimi në Facebook një nga familjarët e së miturës shprehet i pikëlliuar për humbjen e Leas, ndërsa shpreh mirënjohje për të gjithë ata që ndajnë dhimbjen bashkë me ta.
“Me zemër të thyer dhe dhembje të madhe Familja Bajrami në Graz të Austrisë dhe Terpeze Komuna Viti Kosova. Sot humbi jetën tragjikisht në sulmin e ndodhur në Graz te Austrisë mbesa ime, Lea Ilir Bajrami. Lutemi për shpirtin e saj dhe shprehim falenderime për të gjithë ata që ndajnë dhimbjen bashkë me ne, në këto çaste të vështira”, shkroi një nga të afërmit krah fotos së adoleshentes.
Ditën e djeshme një ish-nxënës hapi zjarr në ambientet e një shkolle në qytetin e Grazës. Si pasojë, fatkeqësisht humbën jetën 10 persona, përfshirë dhe autorin e këtij krimi. Mes viktimave të këtij sulmi ishte Lea Bajrami një vajzë shqiptare nga Kosova.
Pas tragjedisë, Austria shpalli tre ditë zie kombëtare, ndërsa vendi është përfshirë nga një valë solidariteti mes qytetarëve dhe partive politike, zakonisht të përçara. Mijëra banorë u mblodhën në sheshin qendror të Grazit për të nderuar viktimat, ku vendosën lule dhe qirinj.
