VLORA- Një 28-vjeçar është arrestuar në Vlorë pasi theu masën e sigurisë “arrest shtëpie” dhe goditi me thikë një34-vjeçar, e më pas i dëmtoi automjetin. I riu Kejvi Bendaj dyshohet se për motive të dobëta nka goditur me thikë 34-vjeçarin dhe i ka dëmtuar automjetin atij.
Më pas, 34-vjeçari ka shkuar te banesa e Kejvi Bendaj dhe i ka dëmtuar makinën duke kërcënuar me një armë gjahu që e posedonte pa leje. Ngjarja ka ndodhur në fshatin Panaja të Vlorë dhe policia ka arritur të ndërhyjë në kohë duke parandaluar përshkallëzimin e konfliktit.
Mësohet se 34-vjeçari i plagosur mori mjekim dhe është jashtë rrezikut për jetën, ndërsa u procedua penalisht nga policia pasi kërcënoi me armë të riun, si edhe i dëmtoi mjetin.
Njoftimi i policisë:
Theu masën e sigurisë “Arrest në shtëpi”, goditi me thikë një 34-vjeçar dhe i dëmtoi automjetin, vihet në pranga 28-vjeçari. Procedohet penalisht edhe 34-vjeçari, sepse kanosi me armë gjahu 28-vjeçarin dhe i dëmtoi automjetin. Sekuestrohet arma e gjahut e përdorur për kanosjen.
Menjëherë pas marrjes së njoftimit për një konflikt të ndodhur në fshatin Panaja, shërbimet e Komisariatit të Policisë Vlorë ndërhynë në kohë dhe parandaluan përshkallëzimin e tij, që mund të kishte sjellë pasoja të rënda.
Si rezultat i veprimeve të shpejta, u arrestua në flagrancë shtetasi K. B., 28 vjeç, banues në Panaja, i cili kishte thyer masën e sigurisë “Arrest në shtëpi”, të caktuar nga Gjykata, për veprat penale “Plagosja e rëndë me dashje” dhe “Shkatërrimi i pronës”.
Gjithashtu, u referuan materialet në Prokurori ku nisi procedimi në gjendje të lirë për shtetasin B. B (H)., 34 vjeç.
Shtetasi K. B. dyshohet se për motive të dobëta, ka goditur me thikë shtetasin B. B. dhe i ka dëmtuar automjetin atij. Më pas, shtetasi B. B ka shkuar te banesa e shtetasit K. B., i ka dëmtuar automjetin dhe e ka kanosur atë, me një armë gjahu të cilën e posedonte pa leje.
Shtetasi B. B. mori mjekim dhe është jashtë rrezikut për jetën. Materialet procedurale iu referuan Prokurorisë pranë Gjykatës së Shkallës së Parë Vlorë, për veprime të mëtejshme.
