TIRANË- Një 41-vjeçar është arrestuar në Tiranë, pasi iu gjetën armë dhe emblema policie. Sipas policisë janë sekuestruar një arsenal armësh dhe municionesh të ndryshme, përfshirë edhe emblema të Policisë së Shtetit. Saimir Allmuça, banues në Tiranë, u arrestua pas ndalimit të tij në Rrugën e Dibrës, ku policia, gjatë kontrollit të automjetit të tij, gjeti një thikë.
Njoftimi i policisë:
Finalizohet nga Komisariati i Policisë Nr. 4, operacioni policor “The Holder”. Sekuestrohen 2 armë zjarri(pistoletë dhe pushkë), 1 armë sportive, 1 armë e ftohtë, municion luftarak dhe emblema policie, vihet në pranga poseduesi.
Shërbimet e Komisariatit të Policisë Nr. 4, në kuadër të veprimeve për goditjen e veprimtarive të paligjshme në të gjitha fushat e shfaqjes së saj, bazuar në inteligjencën policore, organizuan dhe finalizuan operacionin policor “ The Holder” si rezultat i të cilit u arrestua shtetasi S. A., 41 vjeç, banues në Tiranë.
Gjatë operacionit, në Rrugën e Dibrës, shërbimet e Policisë kanë ndaluar automjetin me drejtues shtetasin S. A. Gjatë kontrollit të automjetit, iu gjet e iu sekuestrua një armë e ftohtë(thikë).
Më tej, gjatë kontrollit në banesën e këtij shtetasi, shërbimet e Policisë, gjetën e sekuestruan 2 armë zjarri(pistoletë dhe pushkë), 1 armë sportive, 1 armë e ftohtë, municion luftarak dhe emblema policie. Materialet procedurale iu referuan Prokurorisë së Tiranës, për veprime të mëtejshme.
