Policia e Sarandës ka nisur hetimet, në lidhje me një sipërfaqe të madhe tokash në vendin e quajtur Sorone, në Xarë të Konispolit.
Bëhet fjalë për të ashtuquajturat “Tokat e Bufit”, të cilat i pretendojnë 45 familje të zonës, si kompesim për tokat e përmbytura. Këto familje kanë marrë premtim nga pushtetarë lokale e qendrore për t’u kompensuar në 140 ha tokë të lirë, por kjo ka mbetur ende në letra.
Sipas Policisë, pronare në këto toka janë bërë dy shtetas nga Delvina, për të cilët dyshohet se përmes korrupsionit dhe falsifikimit të dokumenteve, janë bërë pronare, madje duke e regjistruar edhe pranë ASHK Sarandë. Bëhet fjalë për shtetasit Kastriot Metaj e Hektor Myftari, dy biznesmenë nga Delvina, të cilët nga ana e tyre pretendojnë se e kanë siguruar këtë pronë në mënyrë të ligjshme.
“Nga specialistët për Hetimin e Krimeve të Komisariatit të Policisë Sarandë u referuan materialet në Prokurori dhe nisi procedimi penal për shtetasit K. M., 54 vjeç dhe H. M., 60 vjeç, pasi dyshohet se nëpërmjet korrupsionit dhe falsifikimit të dokumenteve, kanë përfituar sipërfaqe toke, në zonën e Soronesë, Xarë”, njoftoi më herët Policia.
