TIRANA- GJKKO ka lënë në fuqi masat e sigurisë “arrest me burg” për të arrestuar gjatë aksionit të SPAK në Shkodër ditën e djeshme ky mes tyre ish-shefi i krimeve, Erjon Dani. Mësohet se në burg janë lënë Arjan Gjata, Vilson Roçi, Musa Gjikola, Akil Alushi, Jani Meçja, Selami Lushka dhe Erjon Dani.
SPAK ka zhvilluar ditën e djeshme një operacion të gjerë në qarqet Shkodër, Elbasan, Vlorë dhe Tiranë ndaj personave nën hetim për trafikun e lëndëve narkotike nga Amerika Latine në vendet e BE. Sipas SPAK nga 13 personat e identifikuar deri tani të përfshirë në këtë grup të strukturuar kriminal, 7 janë arrestuar dhe 6 të tjerë janë në kërkim.
Në njoftimin e SPAK thuhej gjithashtu se janë sekuestruar 5 automjete, 38.970 Euro, 200 Dollarë, 8 telefona celularë, 1 armë sportive, 40 fishekë të kalibrit 7.62 mm, lëndë narkotike e dyshuar “kokainë” si dhe dokumente të ndryshme.
Nga hetimet bëhet me dije se Erjon Dani i cili në atë periudhë ushtronte funksionin si Shef i Policisë Kriminale dhe Shef i Komisariatit të Policisë Nr. 3, Tiranë i ka dhënë të dhënat e TIMS një trafikantit të drogës. Konkretisht Erjon Dani akuzohet për veprën penale “Shpërdorim i detyrës”.
Mësohet se në pranga ditën e djeshme kanë rënë Vilson Roçi, Akil Alushi, Arjan Gjata, Musa Gjikola, Jani Meçja, Selami Lushka ndërkohë që ish-zyrtari i Policisë Erjon Dani është vetëdorëzuar pasdite. Ndër emrat e shpallur në kërkim janë Ledri Lulashi, Lorenzo Çadri (Hysko, Isufi) si dhe Sokol Masha.
