Policia greke në rrugën “Egnatia” në afërsi të Igumenicës ka arrestuar drejtuesin e mjetit grekun Mikhail Angjelo 52 vjeç nga Artemida e Athinës dhe pasagjerin shqiptar Kosta Beqo 54 vjeç nga fshati Çukë i Sarandës.
Gjatë kontrollit në automjetin taksi janë gjetur në bagazh dhe në sendiljet e pasme 72 pako me 81 kg e 704 gramë marijuanë.
Shqiptari ishte person në kërkim në Greqi pasi në vitin 2018 kishte marrë leje nga burgu i Stavrakiou ku prej dy vitesh vuante dënim për çështje droge dhe nuk ishte kthyer më. Policia greke u sekuestroi të dyshuarve edhe 4370 euro.
Ndërkohë po zhvillohen hetime intensive edhe nga Komisariati i Policisë Kufitare Sarandë, i cili është informuar nga homologët grekë. Ndërsa ende nuk ka informacione nëse droga ka kaluar nga kufiri shqiptaro-grek.
