Policia e Tiranës dha hollësi dhe pamje mbi tre arrestimet që ka kryer në rrugën “Myslym Shyri” në Tiranë kundër tarfikantëve të drogës.
Shërbimet e Seksionit për Hetimin e Narkotikëve, thuhet në njoftim, të mbështetura nga inteligjenca operative, në kuadër të një procedimi penal ndjekur me metoda proaktive, nën drejtimin e Prokurorisë Tiranë, kanë organizuar operacionin policor “Collaboration 3”.
Si rezultat i këtij operacioni u bë kapja dhe arrestimi në flagrancë i shtetasve: Paulo Shyti, 35 vjeç, Xhelo Ajasllari, 23 vjeç dhe Ervin Rakipi, 43 vjeç, të tre banues në Tiranë.
Shërbimet e Policisë kanë lokalizuar në rrugën “Myslym Shyri”, shtetasit e lartpërmendur, dhe gjatë kontrollit fizik ndaj shtetasit Paulo Shyti, i gjetën 1 kg e 130 gramë kokainë.
Gjatë ndërhyrjes, shtetasi Ervin Rakipi, nuk i është bindur urdhrave të punonjësve të Policisë.
Lënda narkotike, së bashku me një automjet dhe celularët e shtetasve të arrestuar, u sekuestruan në cilësinë e provës materiale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
