Policia britanike ka publikuar fotografitë e dy shqiptarëve të arrestuar në një shtëpi bari në Neyland.
Bëhet fjalë për Gentian Zhupa, 35 vjeç dhe Ergest Mucopata, 42 vjeç, të cilët kishin punuar në një fermë kanabisi në një njësi në “Honeyborough Industrial Estate” për të shlyer borxhet ndaj një bande kriminale që i kishte kontrabanduar në vend.
Mediat britanike raportojnë se dy shqiptarët u dënuan me 12 muaj burg.
“Është e pritshme që ju të ktheheni në vendin tuaj të origjinës kur të keni mbaruar dënimin.
Sa më e shkurtër të jetë koha në paraburgim në këtë vend, aq më mirë për taksapaguesit britanikë” tha gjykatësi Huw Rees.
Gjatë kontrolleve në shtëpinë e barit u zbuluan llampa për rritjen e kanabisit dhe një sistem i sofistikuar për të ujitur bimët. Gjithashtu u konstatuan lidhje të paligjshme të energjisë elektrike.
Oficerët zbuluan 814 bimë kanabis, të cilat kishin një rendiment të vlerësuar nga 22 kg deri në 68 kg kanabis. Kanabisi do të kishte një vlerë midis 88,000 dhe 350,000 £, në varësi të rendimentit.
Dy shqiptarët, të cilët nuk kishin vendbanim fiks në Britani, nuk kishin dënime të mëparshme.
