Ekskluzive/ Gent Gazheli në prag të arrestimit, përgatitet të kërkojë azil politik në Zvicër

Burime pranë portalit Timoni.al raportojnë se Gent Gazheli, Drejtor i Përgjithshëm i Doganave, po përgatitet të zhvendosë familjen në Zvicër, në rast se ndihet i rrezikuar nga një arrestim i mundshëm nga SPAK. Sipas informacionit të siguruar, Gazheli thuhet se ka gjetur një banesë në shtetin zviceran dhe po planifikon të kërkojë azil politik atje.

Përfshirja në çështje të dyshimta financiare!

Burimet tregojnë gjithashtu se Gazheli është përmendur në lidhje me transferimin e parave të Belinda Ballukut drejt Zvicrës. Ai konsiderohet një nga njerëzit më të besuar të Ballukut dhe, sipas të njëjtave burime, ka qenë i përfshirë në skema korruptive brenda Doganave.

Dokumentet dhe komunikimet zyrtare të referuara tashmë në SPAK tregojnë një skandal të pezulluar prej pesë vitesh, që lidhet me gjobën ndaj kompanisë Bankers Petroleum, me vlerë që arrin deri në 130 milionë euro. Hetimi paraprak filloi në vitin 2020, ndërsa çështja u kalua më pas për kompetencë në SPAK nga Prokuroria e Fierit.

Pas emërimit të Gazhelit si Drejtor i Përgjithshëm i Doganave, shefi i Degës Doganore të Fierit, Olti Kuke, njoftoi zyrtarisht Gazhelin mbi vendimin për gjobë 30 milionë euro ndaj Bankers Petroleum. Sipas kallëzimit, gjoba u rivlerësua më pas në 130 milionë euro, por ky vendim mbeti i pezulluar për shkak të mosveprimit administrativ të Gazhelit, pavarësisht dy njoftimeve zyrtare me shkresë dhe email.

Presion mbi vartësit dhe takime personale

Burime konfidenciale raportojnë se Gazheli zhvilloi takime personale me përfaqësues të kompanisë, ndërkohë që dosja mbeti e papunuar. Olti Kuke, shefi i Doganës së Fierit, raportohet të ketë qenë nën presion të vazhdueshëm dhe u shkarkua nga detyra vetëm dy muaj më parë, duke u transferuar në pozicion specialisti — një lëvizje që burimet lidhin me përpjekjen për të heshtur çështjen.

Publikimi pas pesë vitesh dhe dyshimet për mbrojtje politike

Ironikisht, gjoba ndaj Bankers Petroleum u bë publike vetëm pas pesë vitesh, pikërisht pak ditë pas dorëzimit të dosjes nga Prokuroria e Fierit në SPAK dhe kur rasti u përmend nga Kryetari i KLSH-së dhe deputeti socialist Erion Braçe. Ky zhvillim ka ngjallur dyshime për lidhje politike që, sipas burimeve, kanë “mbrojtur” Gazhelin gjatë gjithë kohës.

Gazheli, i quajtur nga vartësit e tij “Drejtori i 2030-s”, pritet të përballet edhe me kallëzime të tjera, të lidhura me shkelje në sektorin e akcizës dhe tregtinë e mallrave të ndjeshme. Çështja mbetet nën hetim, ndërsa publikimi i mëtejshëm mund të sjellë zhvillime të reja mbi një prej drejtuesve më të diskutuar të doganave shqiptare.