Prishtina ka zyrtarizuar rikthimin e Afrim Tovërlanit si trajnerin e ri të skuadrës bardhekaltër, pas ndarjes së fundit me Arsim Thaqin. Ky vendim vjen si rezultat i një lëvizjeje të shpejtë nga klubi për të plotësuar boshllëkun në pankinë. Tovërlani, i cili deri tani ka qenë trajner i Kombëtare U-21 të Kosovës, kthehet në Prishtinë pas 11 vitesh.
Njoftimi për këtë rikthim është bërë i njohur përmes faqes zyrtare të klubit, ku rikthimi i tij është pritur me entuziazëm. “FC Prishtina prezanton me kënaqësi trajnerin e ri, Afrim Tovërlani, i cili rikthehet në shtëpinë e tij pas një dekade,” thuhet në njoftim. Klubi thekson se Tovërlani ka lënë gjurmë të rëndësishme si si futbollist dhe trajner.
Tovërlani ka drejtuar Prishtinën në dy periudha, nga 2007 në 2009 dhe nga 2012 në 2014, ku ka fituar 7 trofe, përfshirë titullin e kampionit, Kupën e Kosovës dhe Superkupën, duke u renditur si një nga trajnerët më të suksesshëm të klubit. Ai gjithashtu ka pasur një kontribut të madh si futbollist, duke qenë një figurë qendrore e skuadrës në vitet ’80 dhe ’90, madje edhe kapiten për një periudhë të gjatë.
Në përmbyllje, Prishtina shpreh besimin se përvoja dhe profesionalizmi i Tovërlanit do t’i rikthejnë klubit lavdinë dhe trofetë që tifozët presin. Klubi i uron atij mirëseardhje dhe shumë suksese në detyrën e re.
