ITALI- Hetimet për zbardhjen e shkakut të vrasjes së studentes shqiptare, Ilaria Sula kanë marrë rrjedhë tjetër nga detajet e reja që janë zbuluar lidhur me krimin e rëndë.
Sipas medias italiane “La Repubblica”, autori i dyshuar, i riu me origjinë filipinase ka tentuar të mashtrojë prindërit dhe miqtë e tij me llogari të rreme, për të treguar se i kishte marrë të gjitha provimet në Sapienza. Ilaria, raportohet se e ka zbuluar mashtrimin dhe kjo mund të ketë qenë një arsye që çoi në kryerjen e aktit tragjik nga i riu.
Si u vra Ilaria Sula?
Ilaria Sula, rezultonte e zhdukur që prej datës 25 Mars në Romë. Fillimisht kishte dyshimet se ajo ishte larguar pas ndarjes me të dashurin, 23-vjeçarin filipinas, por më pas ngjarjet morën një kthesë dramatike. Trupi i studentes shqiptare u gjet brenda një valixheje të madhe në fund të një shkëmbi në një zonë pyjore në Poli.
Hetimet janë fokusuar tek fundi i lidhjes së saj me të dashurin Filipinas.
Sipas raportimeve ka qenë i riu që dërgoi efektivët në zonën ku u gjet trupi i Ilaria Sulës, e cila studionte në Universitetin Sapienza në Romë. Ilaria ishte larguar nga shtëpia me qira që ndan me tre shoqe të tjera, por nuk ishte kthyer më. Mbrëmjen e 25 Marsit shkëmbeu mesazhe në Whatsapp me shoqet e shtëpisë, të cilat të shqetësuara se ajo nuk ishte kthyer, i kishin shkruar.
Më pas çdo kontakt ishte shkëputur. Ka dyshime se 23-vjeçari Filipinas ka përdorur telefonin e viktimës pas vrasjes së saj për të shkëmbyer mesazhe si edhe për të bërë postime në rrjetet e saj sociale. Sipas medias italiane, ai e ka vrarë Ilaria Sulën duke e goditur me thikë në një apartament në Romë dhe më pas ka hequr qafe trupin pasi e ka futur në një valixhe. Ka qenë edhe analiza e tabulateve të telefonit dhe qelive që inkriminuan të dashurin e viktimës.
