Kantautori italian Fabio Concato ka ndarë lajmin e hidhur për shëndetin e tij, duke zbuluar se po lufton me një diagnozë kanceri. Ai e konfirmoi këtë përmes një postimi në rrjetet sociale, duke shpjeguar se për shkak të kësaj sëmundjeje, ishte i detyruar të anulonte koncertet që kishte planifikuar për fundin e muajit qershor. Në mesazhin e tij, Concato shprehu besim se do t’i përballonte sfidat e trajtimit dhe theksoi se ndjehej i qetë dhe mirënjohës për të gjithë ata që kishin shprehur shqetësim dhe mbështetje për të.
Artistin 72-vjeçar, i njohur me emrin e vërtetë Fabio Piccaluga, u lind në Milano dhe ka lënë gjurmë të thella në muzikën italiane që nga vitet 1970. Ai filloi karrierën me grupin kabare “I mormoranti”, para se të niste një rrugëtim solo që e bëri të njohur për këngët e tij të dashura si “Domenica bestiale”, “Fiore di maggio”, dhe “Guido piano”. Meloditë e tij elegante dhe tekstet e ndjera, së bashku me një zë të ngrohtë, e kanë bërë atë një ikonë të muzikës italiane.
Në dekadat e fundit, Concato ka vazhduar të eksplorojë zhanre të reja, përfshirë jazz-in, me albumin e tij të vitit 2001 “Ballando con Chet Baker”, që është një homazh për legjendën e jazz-it amerikan. Ai së fundmi kishte qenë aktiv në turneun “Musico Ambulante”, ku rikthente në skenë këngët më të njohura dhe ndante histori nga një karrierë që zgjat mbi 50 vjet.
Reagimet ndaj njoftimit të tij kanë qenë të shumta, me fansat dhe kolegët artistë që i kanë shprehur mbështetje dhe dashuri përmes rrjeteve sociale. Të gjithë shpresojnë për një rikuperim të shpejtë për Concato dhe një rikthim të tij të shëndetshëm në skenë, duke vazhduar të ndajnë muzikën e tij të dashur me publikun.
