Një ngjarje e rëndë ka tronditur Austri duke rezultuar në ngritjen e akuzave të rënda ndaj një çifti 27-vjeçar për vrasje, torturë dhe rrëmbim, lidhur me vdekjen e djalit të tyre trevjeçar në maj të vitit 2024. Prokuroria e Innsbruck-ut ka zbuluar se fëmija ka kaluar muaj të tërë nën një abuzim sistematik dhe privim ekstrem nga ushqimi e uji në banesën e tyre në Kufstein, afër kufirit me Bavarinë.
Hetimet kanë zbuluar prova të shumta, përfshirë mesazhe, foto dhe video që dokumentojnë dhunën e përjetuar nga çuni. Rasti, i raportuar fillimisht nga Frankfurter Allgemeine Zeitung, ka shkaktuar reagime të forta dhe indinjatë të gjerë në Austri. Aktakuzat tregojnë se fëmija është rrahur, lidhur dhe mbyllur shumë herë në një dhomë të errët, duke u detyruar të qëndronte lakuriq për ditë të tëra brenda një sirtari. Ajo që është akoma më shqetësuese është se prindërit kanë privuar qëllimisht djalin nga ushqimi dhe uji, çka ka sjellë që pesha e tij të arrijë në vetëm 7 kilogramë, më pak se gjysma e asaj që do ishte normale për moshën e tij.
Prokuroria gjithashtu ka përdorur komunikimet midis prindërve dhe materialet filmike si provat kryesore të abuzimit. Gjatë marrjes në pyetje, të pandehurit kanë pranuar përgjegjësinë për veprat e tyre. Një ekspertizë psikiatrike e kërkuar nga hetuesit ka konfirmuar se çifti ishte plotësisht i përgjegjshëm në momentin e ngjarjeve, megjithatë u identifikua një çrregullim i rëndë personaliteti me tipare sadiste.
Çifti jetonte në kushte të vështira ekonomike dhe kishte filluar të izoloheshin, duke ushtruar bindje të çuditshme dhe pretenduar se djali ishte “i pushtuar nga një demon”, e duke e akuzuar atë për fatkeqësitë e tyre. Megjithatë, mjekët përjashtuan çdo formë paaftësie mendore që do t’u hiqte përgjegjësinë penale. Tani, çiftin e presin seancat gjyqësore në Innsbruck, në një rast që po trajtohet si ndër më të rëndët të viteve të fundit në Austrinë e moderne.
