NIGERI – Të paktën 22 persona, kryesisht sportistë, u vranë kur një autobus u rrëzua nga një urë, pasi shoferi me sa duket humbi kontrollin e automjetit në Nigerinë veriore, thanë autoritetet.
Tragjedia ndodhi këtë të shtunë në një autostradë pranë zonës Gadar Yankifi në shtetin verior të Kano, nga ku ishin viktimat. Ata po ktheheshin nga një kampionat sportiv i mbajtur këtë javë në shtetin jugperëndimor të Ogunit.
“Me hidhërim të thellë mora lajmin tragjik për incidentin e pafat që mori jetën e 22 qytetarëve të pafajshëm dhe la disa të tjerë të plagosur”, tha guvernatori i Kanos, Abba Yusuf, në një deklaratë të raportuar nga mediat lokale të dielën.
“Në emër të qeverisë dhe popullit të shtetit Kano, u shpreh ngushëllimet tona të sinqerta familjeve të të ndjerëve”, shtoi Yusuf në deklaratën zyrtare.
Viktimat ishin pjesë e delegacionit zyrtar nga Kano, i dërguar në Festivalin Kombëtar të Sporteve Ogu, ku përfshiheshin atletë, trajnerë dhe zyrtarë shtetërorë.
Korpusi Federal i Sigurisë Rrugore (FRSC) tha se autobusi mbante 32 persona (31 burra dhe një grua) dhe se aksidenti “mund të ketë ndodhur si rezultat i lodhjes dhe shpejtësisë së tepërt pas një udhëtimi të gjatë nate”.
Presidenti nigerian, Bola Ahmed Tinubu, tha se tragjedia përfaqëson “një goditje shkatërruese për kombin”.
Incidenti “hedh një hije mbi Festivalin Kombëtar të Sporteve”, i cili prej kohësh ka shërbyer si një “platformë për të zbuluar dhe mbështetur sportistët që e kanë bërë Nigerinë krenare si në nivel kombëtar ashtu edhe ndërkombëtar”, tha Tinubi në një deklaratë të lëshuar nga këshilltari i tij special për informacion dhe strategji, Bayo Onanuga.
Festivali Kombëtar i Sporteve është një ngjarje e madhe shumësportive në Nigeri, që tërheq atletë nga shtete të ndryshme në të gjithë vendin me qëllim nxitjen e unitetit, zhvillimit atletik dhe përsosmërisë.
