Shteti Krujën dhe Fushë Krujën i ka jashtë kontrollit. Konstatimi është i rëndë, por faktet që vijnë nga Kruja janë akoma më të rënda. Pas shpërthimeve me tritol, kanabisit dhe vrasjeve, e fundit vetëm tre net më parë, dje ka ndodhur një tjetër ngjarje mizore.
Dhunë barbare. Fisi i deputetit socialist Rrahman Rraja dhunuan kafshërisht dy qytetarë, Jashar dhe Bilbil Maja, të cilët një muaj më parë u ankuan publikisht se shpërthimet nga gurorja që ka Përparim Rraja, i afërm i deputetit u kishin çarë shtëpitë.
Çfarë ndodhi dje?
Shkopinj, hunj, karrige, grushte, shkelma, por edhe armën në kokë. Kjo është panorama e rëndë e sherrit që ndodhi mesditën e djeshme në një lokal në aksin Fushë Krujë-Thumanë. “5Pyetjet.al” disponon videon, e cila ka përmbajtje është shumë të rëndë dhune.
Agresorët ishin disa dhe zbarkuan brenda lokalit me disa makina. Skenën që kishin përgatitur e filmojnë. Sapo zbresin futen në lokal me vrap. Britma dhe ulërima në lokal. Drejtohen për tek tavolina që ishin ulur Bilbil dhe Jashar Maja.
Mbi ta fillojnë goditjet me hunj dhe gjithçka tjetër. I gjakosin duke i goditur pa pushim. Dy vëllezërit Maja shfaqen të shtrirë në tokë të gjakosur. Megjithatë grupi Rraja nuk ndalon duke vijuar goditjet.
Katër janë arrestuar dhe tre janë në kërkim. Të arrestuar janë;
Ineid Rraja
Eni Kullaj
Kujtim Përdaku
Andi Rraja
Në kërkim janë tre persona, dy prej tyre janë vëllezërit e deputetit socialist Rrahman Rraja;
Flamur Rraja
Xhelal Rraja
Flamur Rraja në video shfaqet me pistoletë në dorë drejtuar Jashar Majës. Gjithashtu është marrë në pyetje pronari i gurores, Përparim Rraja, kushëriri i deputetit të Krujës. Lejen e kishte Përparim Rraja, por vëllezërit Maja ishin ankuar për shkak se u ishte dëmtuar shtëpia nga shpërthimet e forta me eksploziv.
Paralajmërimi për hakmarrje
Jashar Maja, personi i cili u dhunua nga anëtarët e fisit Rraja deklaroi se nuk do ta lerë me kaq dhunën që u ushtrua kundër tij dhe kushëririt të tij, Bilbilit. Ai deklaroi qartë se do të hakmerret dhe do ta zgjidhë personalisht nëse shteti nuk reagon dhe t’i kompensojë dëmin. “Video është filmuar nga ata për të treguar autoritetin, ja kush jemi ne. Po mos të ketë gajle, se do t’i bëjë dhe unë një video, se ai nuk e di se kush jam.
Do t’ia tregoj unë se kush jam. Më njeh në ajër, por kur ta bëjë videon do ta shohë gjithë bota çfarë do t’i bëj Xhelal Rrajës”, tha Maja. Që nesër të mos jetë vonë policia e shtetit duhet të reagojë sot dhe pa vonesa përballë gjithkujt pa dallim pushteti apo pozite.
