TIRANA- Të enjten e Madhe të krishterët lyejnë një pjesë nga vezët e Pashkës. Për ta veza e Pashkëve është simbolike e ringjalljes së Jezu Krishtit. Veza simbolizon jetën, që është e mbyllur dhe e përgjumur brenda lëvozhgës së saj, që në momentin që shpërthen del në dritë.
Ngjyra e kuqe e vezëve simbolizon flijimin dhe në rastin konkret simbolizon flijimin e Krishtit, simbolikë e fitores, gëzimit dhe jetës. Kështu lëvozhga e vezës simbolizon varrin e Krishtit, që u hap dhe dha jetë. Pashkët ishin shansi i parë për të ngrënë vezë pas një periudhe të gjatë të kreshmës pa ngrënë mish dhe bulmet.
Po për vezën e kuqe ekziston dhe një gojëdhënë ku thuhet se kur Maria Magdalena, pas ngjalljes së Krishtit, vajti te Pilati t’i njoftonte ngjarjen dhe i shpuri si dhuratë një shportë me vezë të bardha, sipas zakonit të atëhershëm, ai i tha: Sa mund të bëhen të kuqe vezët që solle, aq mund të jetë ngjallur Krishti. Dhe për çudi, vezët u bënë menjëherë të kuqe.
