Kreu i Sindikatës së Universiteteve Sandër Kovaçi tha se pedagogët duhet të vijojnë protestat, pasi siç shtoi ai, kjo qëndresë e tyre është për të shpëtuar universitetin të mos shkojë drejt greminës.
“Do ngelin auditorët pa studentë. Ky është momenti pa kthim, që të bëhet diçka, që universitetet të mos shkojnë drejt greminës”, theksoi Kovaçi.
Ai u bëri thirrje rektorëve, që të mbështesin protestën pasi sipas profesorit, ky është shansi i fundit për të bërë një ndryshim në universitetet shqiptare.
“Profesorati duhet të trajtohet më mirë financiarisht. Unë u bëj thirrje rektorëve të universiteteve publike, të mbajnë qëndrim në lidhje me këtë protesta. Ky është shansi i fundit për të bërë një ndryshim në universitetet shqiptare”, shtoi Kovaçi.
Kryeministri Rama e cilësoi Sandër Kovaçin si pjesëtar të “SHIK-ut”, ndërsa ky i fundit pati një mesazh për shefin e qeverisë.
“Mos u merr me biografi. Jam shumë i kënaqur, që më ka dhënë pak famë, edhe pse nuk e kisha të nevojshme. Nuk ka të bëjë me një person që ka ardhur nga rruga dhe në universitet. Ai mendon se ka të bëjë me injorantë këtu. jemi para një personi të përgjegjshëm, i cili ka luftuar për të drejtën”, theksoi ai.
