SHBA- Dy zjarrfikës janë qëlluar për vdekje në Idaho, në veriperëndim të SHBA-së, ndërsa po përgjigjeshin për shuarjen e një zjarri në shkurre. Një tjetër zjarrfikës u plagos kur një i dyshuar hapi zjarr me një pushkë pranë qytetit të Coeur d’Alene, sipas Zyrës së Sherifit të Qarkut Kootenai.
Oficerët e SWAT, pas mbërritjes në vendngjarje gjetën një burrë të vdekur afër vendit ku ndodhi sulmi në malin Canfield dhe hoqën urdhrin për strehim në vend. I dyshuari besohet se e kishte ndezur zjarrin qëllimisht, si një mënyrë për të bërë pritë ekipeve të ndihmës së shpejtë.
Sipas policisë, burrit të vdekur iu gjet një armë zjarri pranë tij pas përleshjes me orë të tëra, ku pati edhe të shtëna nga policia. Policia është ende në pritje të identifikimit zyrtar dhe thotë se ende nuk dihet asgjë për të kaluarën e tij. Sherifi Norris tha se një hetim paraprak ka zbuluar se ka pasur vetëm një person të armatosur, ndërsa më herët tha se mund të ketë pasur deri në katër sulmues të ndryshëm.
“Kjo ishte një pritë totale. Këta zjarrfikës nuk patën asnjë shans”, tha sherifi, shkruan BBC. Ai shtoi se hetuesit duhej ta kontrollonin shpejt vendin e ngjarjes, për shkak të zjarrit që po përhapej, dhe se informacioni që kishin ishte ende “shumë, shumë paraprak”.
Njoftimi për zjarr në shkurre erdhi rreth orës 13:22 sipas orës lokale (20:22 GMT) të dielën. Në orën 14:00, zjarrfikësit raportuan të shtëna dhe mbi 300 oficerë të zbatimit të ligjit nxituan në vendngjarje. Gjithashtu u dërguan agjentë të FBI-së. Sherifi tha se autori i të shtënave ishte fshehur midis shkurreve të dendura dhe pemëve të dendura, duke shtuar se snajperët e policisë dërguan helikopterë mbi vendngjarje. Zyrtarët i kishin bërë thirrje publikut të qëndronte larg dhe të mos fluturonte dronë mbi vendngjarje.
Rasti ishte një tronditje e madhe për ata që jetojnë në Coeur d’Alene, një qytet me rreth 56,000 banorë që ndodhet pranë kufirit me shtetin e Uashingtonit.
