SAZAN- Policia kufitare e Vlorës, ka arritur të parandalojë një rast të dyshuar të trafikut të lëndëve narkotike. Bëhet me dije se pas marrjes së informacionit për një mjet të dyshuar që mund të bënte lëvizje të kundraligjshme, duke ardhur nga Italia për t’u larguar më pas përsëri në drejtim të shtetit fqinj, nisën kontrolle në të gjithë zonën e Sazanit.
Sipas informacioneve, gjatë kontrolleve, policia kufitare gjeti mbi 3000 litra karburant në ishullin e Sazanit, të cilat mund të përdoreshin nga mjeti ujor ku dyshimi është për lëndë narkotike. Pas pikasjes së lëndës, kufitarja ka thirrur të gjithë drejtuesit e mjeteve ujore për raportimin e vendndodhjes së mjeteve të tyre duke i vendosur në një regjistrim i cili mungonte prej vitesh.
Pavarësisht se nuk u arrit të kapej mjet ujor dhe rasti ngeli në tentativë, tashmë kanë nisur hetimet për personat që çuan karburantin në ishullin e Sazanit si dhe motivin e dërgimit të lëndës në Sazan 4 ditë më parë.
