Gjykata e Durrësit ka vendosur të lirojë katër personat e arrestuar lidhur me vrasjen e dyfishtë që ndodhi në Manzë ditët e fundit. Të arrestuarit janë Erald Cani, 25 vjeç, Ergi Kadiu, 21 vjeç, Taulant Beqja, 37 vjeç dhe Emirian Beqja, 34 vjeç, të gjithë banues në këtë zonë. Ata u lanë në masën e ‘detyrimit për t’u paraqitur’ dhe ‘ndalimit për të dalë jashtë vendit’, ndërkohë që hetimet për rastin vazhdojnë.
Ndërkohë, autor i dyshuar i njërës prej vrasjeve, Daniel Pepa, 21 vjeç, është ende në kërkim. Ai akuzohet për vrasjen e Flori Paluçit dhe për veprat penale “Vrasja me dashje” si dhe “Mbajtja pa leje e armëve dhe municionit”. Po ashtu, në kërkim është edhe Gëzim Allçi, 30 vjeç, i cili dyshohet se ka ndihmuar Pepën të largohet nga vendi i ngjarjes.
Vrasjet e Aranit Kurtit dhe Flori Paluçit ndodhën në orët e para të mëngjesit të së mërkurës, pas një sherri banal në një nga lokalet e Manzës. Policia vazhdon punën për gjetjen e dy të kërkuarve.
