Dy të rinj nga Teksasi, Gavin Rivers Weisenburg, 21 vjeç, dhe Tanner Christopher Thomas, 20 vjeç, janë arrestuar nën dyshimin se kishin planifikuar pushtimin e një ishulli me qëllim eliminimin e burrave dhe skllavërimin seksual të grave e të miturve. Sipas autoriteteve, hetimet tregojnë se plani, i cili kishte filluar të hartohej në gusht 2024, përfshinte përditësime të vazhdueshme deri në verën e 2025, si dhe shënime operative dhe skenarë sulmi.
Thomas, duke u rekrutuar në Forcat Ajrore, synonte të fitonte aftësi për t’i përdorur në këtë operacion, ndërsa Weisenburg ndoqi trajnim civil dhe detar. Dy të rinjtë, gjithashtu, kërkonin të rekrutonin persona të pastrehë në SHBA për t’i përdorur si luftëtarë në planin e tyre.
Ishulli i zgjedhur, Gonave, u konsiderua një objektiv i lehtë për shkak të izolimit dhe mungesës së forcave të sigurisë. Hetuesit zbuluan se ata kishin studiuar harta dhe pika zbarkimi me qëllim vendosjen e kontrollit të menjëhershëm mbi territorin para se autoritetet haitiane të reagonin.
Aktualisht, Weisenburg dhe Thomas përballen me akuza të rënda, duke përfshirë komplot për të kryer vrasje në një vend të huaj, sulm të rëndë fizik dhe prodhim të pornografisë me fëmijë. Nëse shpallen fajtorë, ata mund të përballen me burgim të përjetshëm për komplotin e vrasjes, ndërsa akuzat për shfrytëzim seksual të miturve parashikojnë dënime nga 15 deri në 30 vjet.
