Prokuroria e Tiranës ka ngritur akuzë ndaj dy obstetër-gjinekologëve, I.M. dhe E.K., që dyshohen për neglizhencë në trajtimin e një pacienteje, e cila humbi foshnjën gjatë shtatzënisë së saj. Sipas hetimeve të procedimit penal nr.225, të nisura pas denoncimit nga G.S., mjeket kanë vepruar me pakujdesi duke mos respektuar protokollet standarde dhe duke mos monitoruar shenjat vitale të pacientes.
Gjatë monitorimit të shtatzënisë, mjekja I.M. nuk ka mbajtur historikun e të dhënave mjekësore, edhe pse e kishte ndjekur pacienten për një kohë të gjatë. Ajo nuk ka ndërmarrë ekzaminime të nevojshme për t’u përgjigjur shqetësimeve të vazhdueshme të pacientes, çka ka sjellë lindjen e një foshnje prematur me probleme shëndetësore dhe vdekjen e saj, duke rrezikuar edhe shëndetin e nënës.
Pas kësaj situate, pacienteja iu drejtua mjekes E.K. për vazhdimin e ndjekjes. Edhe kjo e fundit kreu veprime dhe mosveprime të papërshtatshme, duke rrezikuar jetën e grave dhe të foshnjës. G.S. pati simptoma që tregonin për një gjendje serioze, e cila më vonë u identifikua si pre-eklampsi e rëndë. Mjekja E.K. nuk ndërmori asnjë masë për trajtimin e kësaj gjendjeje, pavarësisht vizitave në klinikën private.
Janë konstatuar mungesa dokumentimi lidhur me matjen e parametrave vitalë, si tensioni dhe pesha trupore, gjë që do të kishte kontribuar në vendimmarrjen e duhur mjekësore. Prokuroria vlerëson se mungesa e historikut mjekësor është një tregues i qartë i moszbatimit të detyrimeve ligjore nga ana e mjekëve.
Pacientja ishte shtruar në maternitetin “Koço Gliozheni” me diagnozë të rëndë, pre-eklampsi e avancuar, duke kërkuar ndërprerjen e menjëhershme të shtatzënisë. Situata e krijuar ishte rezultat i neglizhencës nga mjeket E.K. dhe I.M. Prokuroria e Tiranës konsideron se veprimet e këtyre mjekëve plotësojnë kriteret për akuzën e “Neglizhencës në trajtimin mjekësor” e parashikuar nga Kodi Penal.
