Një aksident tragjik ka ndodhur në Ugandë, ku humbën jetën 46 persona. Ngjarja u regjistrua në autostradën Kampala-Gulu, rreth orës 00:15 me orën lokale, kur dy autobusë që udhëtonin në drejtime të kundërta u përplasën direkt duke u përpjekur të parakalonin një kamion dhe një automjet tjetër. Njëri nga autobusët tentoi të shmangte përplasjen, çka rezultoi në një aksident zinxhir, ku edhe automjetet e tjera humbën kontrollin dhe u përmbysën.
Përveç viktimave fatale, disa pasagjerë të autobusëve dhe automjeteve të tjera përfituan lëndime, dhe ata janë transportuar për ndihmë në spitale në qytetin Kiryandongo të Ugandës. Policia e vendit ka njoftuar se po bashkëpunon me shërbimet shëndetësore dhe ato të urgjencës për të verifikuar numrin e viktimave dhe për të ofruar informacione të sakta, teksa hetimet vazhdojnë për shkaqet e aksidentit.
Autostrada midis kryeqytetit Kampala dhe qytetit verior Gulu është e njohur si një nga arteriet më të ngarkuara në Ugandë, e cila shërben si një lidhje jetike për transportin midis këtyre dy zonave. Aksidenti ka trazuar qytetarët dhe autoritetet lokale, të cilët po ndjekin me vëmendje situatën për të shmangur tragjedi të ngjashme në të ardhmen.
