Katër persona janë arrestuar nga policia për vrasjen e dyfishtë që ndodhi në Manzë të Durrësit, ku viktima janë Flori Paluçi dhe Aranit Kurti. Të arrestuarit, Erald Cani, Ergi Kadiu, Taulant Beqja dhe Emirjan Beqja, akuzohen për veprat penale “Vrasja me dashje” dhe “Mbajtja pa leje dhe prodhimi i armëve”.
Policia ka identifikuar dhe shpallur në kërkim dy shtetas, mes tyre Daniel Pepa, i dyshuar si autor i njërës nga vrasjet, dhe G. A., një 30-vjeçar nga Manza, i akuzuar për “Mbajtja pa leje e armëve” dhe “Moskallëzimi i krimit”.
Sipas hetimeve, ngjarja nisi pas një konflikti verbal mes Daniel Pepës, kamerierit të një lokali dhe Flori Paluçit. Pas këtij konflikti, Danieli u largua, por u rikthye me të arrestuarit Ergi Kadiu dhe Aranit Kurti. Gjatë tentativës për të hyrë në lokal, Paluçi dolën dhe dyshohet se qëlloi me armë në tokë. Danieli i është kundërpërgjigjur dhe e ka plagosur Paluçin, i cili ka qëlluar gjithashtu në drejtim të Danielit dhe Aranitit.
Si pasojë e konfliktit, u vranë Flori Paluçi dhe Aranit Kurti. Pas ngjarjes, dyshohet se G. A. u largua me Daniel Pepën. Policia është angazhuar në kërkime intensive për të kapur të dyshuarit dhe po punon në sigurimin e provave për të dokumentuar përgjegjësitë penale të të gjithë të përfshirëve.
Materialet procedurale janë referuar Prokurorisë së Durrësit për veprime të mëtejshme. Hetimi vijon nën drejtimin e Prokurorisë, e cila po përpiqet të zbardhë të gjitha aspektet e ngjarjes dhe të përcaktojë rolet e secilit Person të përfshirë.
